cheese cake: تجارب

‏إظهار الرسائل ذات التسميات تجارب. إظهار كافة الرسائل

الاثنين، أغسطس 15، 2011

flake

رحت الجمعيه باخذلي أغراض ناقصتني حق الحلو ولفت انتباهي عرض مسويتة شركة كاكاو فليك ومن ضمن المقاير المحتاجتها كاكاو فليك ...

واهوا عبارة عن علبة فيها خمس حبات كاكاو فليك وداخل العلبة فيه كابون.

الكابون فيه رقم سري نمسح المربع الفضي علشان نعرف رقمنا وبعدها ندخل موقع فليك موقع فلايك اربيا ونختار مربع اللي فيه السحب وندخل الرقم التسلسلي وأنتي وحظج لأن راح يقولون لج حزتها اذا فزتي بعلبة الميك اب او حظ اوفر

انا طبعا فزت بس ..... مو بعلبة الميك الاب بنغمة الخاصة في فليك واتمنى ان يحالفكم الحظ وتفوزون بالميك اب

السبت، أغسطس 06، 2011

Skin Care

الله رزقني ببشرة صافيه وخاليه من الحبوب والخدوش الحمدالله والشكر لك يا رب هاذي نعمة من الله, وانا من النوع اللي ما احب اتعبث ببشرتي لاني اعرف ضرر الكريمات وضرر كثر استخدامها على البشره اذا ما يبين اللحين يبين بعدين, بس بين فترة والثانية وودي احسن من طبيعة بشرتي بطريقة ما تضرني وتكون الكريمات اللي استخدمها طبيعية او خفيفة على البشرة .

فقلت راح ابتدي بتنظيف بشرتي اول من الشوائب والميك الاب بستخدام السكنول والقطن طبعا

وعقب ما نظفت بشرتي استخدمت كريم فير اند لفلي كمبتدئة

استمريت على هالطريقة شهرين واللي لاحظته ببشرتي :-

1-فتح لون بشرتي .

2- توحد لون بشرتي اكثر من اول .

3- حسيت بصفاء ونظافه ونعومه .

ملاحظة :- احب اقولكم ان هاذي اول مستحضرات استخدمها واداوم عليها لمدة شهرين متتالين, كنت استخدم قبل بس ما كنت استمر.

*اتمنى من اللي عندهم خبرة بمستحضرات العناية بالبشرة يقترح علي مستحضر اجربة بس يكون خفيف على البشره.

الأربعاء، أغسطس 03، 2011

ماي اللقاح وتأثيره على الصايم

بما ان احنا اللحين بشهر رمضان المبارك وبفصل الصيف الحار حبيت افيدكم بشغله جربتها وارتحت عليها الحمدالله وخاصة حق اللي يداومون التعب كلة يهون الا العطش وخاصة بجونا الحار اللي ينشف الريج

الطريقة سهلة جدا وما تكلف وايد واهيا عبارة عن :

كوب ماء

وماء اللقاح

طبعا قبل لا تنامون تشربون كوب ماي وحطوا معاه ملعقة اكل ماي لقاح واللي يبي يزيد او يقلل حسب الرغبة .

الاثنين، مارس 21، 2011

كوكيز ميني ديلايتس

وانا رايحه محل ميني ديلايتس باخذ منه المني تشيز كيك

شفت عندهم شي يديد اللي اهو الكوكيز وسالتها من متى عندكم كوكيز قالت من اسبوعين تقريبا وخذيت لي علبه منهم فيها تقريبا 12 حبه ميكس

وعندهم كرواسون بعدة نكهات بس حسافه كان مخلص ما جربته

انواع الميني تشيز كيك اللي المختصين فيها

هذا النوع تشيزكيك بالكنافه وااايد حلوو وانصحكم فيه

في هالبوست حبيت انقل لكم تجربتي عن الكوكيز لمحل ميني ديلايتس : عجبني حيل وحبيت طعمه مو حالي وايد وترف ومتنوع .

الاثنين، مارس 07، 2011

تجربتي مع كافيه حليب وهيل

مكانه : المباركية بجانب سوق المناخ

طلب زوجي حليب بالهيل

طلبي انا حليب بالزنجبيل

فرايز

طلباتنا

برجر بالبهارات الكويتيه او على الطريقة الكويتيه مو متاكده من الاسم بالخبز الايراني حقي

كلوب ساندوتش حق زوجي

واحنا رادين المصافط لقينا ريال عوود اتوقع ايراني مبسط ويبيع شغلات من ايران عاد اشتهيت القز خاصة انا من عشاقة

رايي بالكافيه :

...عجبتني فكرة الكافيه بحيث انه مواكب العصر بالشكل والتقديم بس له طابع كويتي بحت من حيث المنيو...

...اول ما دخلت الكافيه كان زحمممه وازعاج ولويه وكل واحد واقف ينطر احد يقوم يعني كل واحد قاعد ويراقب الطاولات اي احد يقوم يقعد مكانه مافي تنسيق وتنظيم بين الادارة والزباين يعني من سبق لبق...

...قعدنا على الطاولة وكان فيها بقايا اكل وصحون قعدنا عشر دقايق علشان نحصل الجرسون عشان يشيل وينظف ....

...الجرسون كان يمرنا بسرعه اتوقع من كثر الطلبات والشغل مو قادر يحك راسه متدوده ...

...عقب ما طلبنا الحليب طلبنا معاه دوة قال مافي لان زحمه الجرسونات مو قادرين يالله يخلصون طلبات الزباين ...

...لما ياب كوب الحليب الكوب كان في ريحة زفره الظاهر مو غاسلين الكوب عدل من الضغط واللويه او كان غسل يدوي مو مكينه بخار ...

...ما شربت الحليب انا وزوجي خلينا مثل ما اهووو...

...الاكل بالعكس عجبني وكان لذيذ وحار...

((اتمنى ممن ادارة كافيه حليب وهيل انهم يحسبون حساب للزباين وخاصه بالزحمه ويكون في تنظيم بين الادراة والزباين ))

الاثنين، فبراير 28، 2011

مرت علي ايام كنت اطلع اماكن بس استكشف واجرب شغلات يديده اول مرة بحياتي اجربها كنت استمتع لما احس اني ضفت شي يديد على حياتي لان انا من نوعي ما احب الروتين واحب كل شي غريب ويديد ... طلعت مع زوجي حق مجمع البيرق وقررنا انا نقعد بكافيه جلوريا لان مكانهم شرح وقعداتهم حلوه