تجارب

توني ياية من جمعية العدان كنت رايحة اخذ حق بنتي حليب وشفت هالشوكلت وعجبوني

واول مرة اشوفهم وقلت يالله نجربهم وانقلكم تجربتي

شوكلت ميلكا انا شايفه نوع واحد بس هذا اول مرة اشوفه نفس كيك ماركس سبنسر

نفس الطعم تقريبا بس ماركس سبنسر اكبر وارخص هذا سعرة 1,500

وهذا عصر اناناس +حليب+جوزالهند حسيته غريب وطعمه والله حلو مش بطال بس طعمه ذكرني بماليزيا لما كانا قاعدين انا وريلي جبال البحر على كراسي القش ووشير جوز الهند حوالينا وعطونا عصير داخل حبة جوز الهند نفس طعم هذا تقريبا




وهذا سلمكم الله شوكلت نوتلا مع عيدان بسكوت الظاهر مسوينه حق مباريات كاس العالم الواحد يكل ويطالع واهوا داخل الملعب وحجمه صغير وفكرت اني احطة بجنطتي اذا بغيت اروح السينما واتسلى فيه انا اطالع الموفي

علية صور كور وعلامة الفيفا

وهذا حجمة بالنسبه لماي ابراج

و من جواااا

وسلامتكم وتعيشوووون

SEE U SOON

مطعم غاردن الأيراني

بما ان رورو الشخبوظه شوقتني على هالمطعم في بوستها اللي عن مطعم غاردن رحتله وكلي شوق ولهفة على أكلهم وفعلا المطعم يستاهل اللي يزوره من ناحية الخدمة والسعر والاكل كله حلو ومكانهم بالافينيوز وثانكيوو على المعلومات اللي خذيتها من بلوقج يارورو الحلوة :) عن هالمطعم طلبت نفس طلباتج وزدت عليهم تجربتي ......

على فكرة المطعم ايراني

فلفل ومرق باميه

الخبز الأيراني الحاااااار المسمسم

مقبلاتهم




سلطة شيرازيه جنه جذي اسمها
وكشك باذنجان ودولمه



دولمه








وهاذي نفس السلطة

والكشك باذنجان

وشبزي

وكباب كوبيدة مع عيش بالزعفران

نرد مرة ثانيه حق جيان والله جني صرت مراسلتكم من جيان

شفت شوكلت Guylian بس مطورينه مسوينه نفس شوكلت جواهر

وجذبني شكله وحسيته لذيذ بس التجربه خير برهان

هذا شكله

والطعم في أنواع , دارك ,وكوفي ,كراميل وووو

بس الطعم مو شي الله يزيد النعمه جنه كاكاوات الشويخ أسواق الجمله وثقيييييييييل

تجربه فاشله ):

شمبانيا حلال

أمس رحت مطعم حسني اللي بحولي فوق سنتر بوينت ...




المطعم حلو ونظيف وخدمتهم حلوه وأكلهم جنه أكل بيت وجو المطعم يحسسكم جنكم بمصر ...


وانا اتصفح المنيو لفت انتباهي كلمة شمبانيا في قائمة المشروبات صراحة انا انصدمت قلت هاااا اخاف مضيعين بالمنيو يايبين مال مصر بس بعدين انتبهت ان مكتوب بدون كحول قلت الااااا اطلبه واشوف شسالفتة ولما قاله زوجي نبي شمابنا قال الجرسون

المصري الدايخ : بس ده بدون كحول

زوجي ارتسمت على ويهه علامات الدهشة

زوجي : ادري ...شنو قصدك

الجرسون الدايخ : اصلي احنا مابنعملهاش هنا

أنا : !!!!!!!!!!!!!!!!! نو كومنت

زوجي : انت يديد اهنيه بالمطعم ترى احنا بالكويت شفيك ؟؟؟؟

والله انا قعدت 5 دقايق متنحة على كلامه الظاهر اول مرة ييي الكويت ..

وهاذي الكبينه

هذا المعرس وصل

اهنيه لما فتحه الجرسون واهوااا عايش الجو شلون يفتحه وشلون يصب ذكروني

بالافلام المصريه اول الافلام الملونه

واهنيه جلاصي ارتسم فيه قلب حب

وقبل لا اشرب شلت الغطا اللي مغطين فيه الشمبانا بشوفه شنوو هذا ولا مــــــــــــالت ايفا ما غيره وشمبانيا وشمبانيا وأخر شي طلع ايفا

وطلبنا باذنجان مخلل وطماط مخلل

وسلطة جرجير واهما يابوا لنا ليمون وسلطة فيه زبادي هاذي مقبلاتهم

والخبز المصري حار ومتفخ لذيذ

وسمج سبيطي مشوي وبالخلطة لذيذ

وربيان بالخلطة مع شوربه لما يابها الجرسون يقول حق زوجي بعد ما تاكل الربيان اشرب الشوربه هيا حتعملك كدا ويقمزله بعينه وانا طاقتني البوه من كلامة حسيت انه مو صاحي وماعليه شرهه

وربيان مشوي لذيذ

هاذي الفاتورة وجيكوا على الشمبانيا

,,,,,,,,, وبــــــــــــس وبالعافية علينا ,,,,,,,,,

شعر البنات

ألة شعر البنات أو غزل البنات موجوده في - جيــان -

سعرها8,990

بما الأمتحانات خلصت عزمت خواتي ذاك اليوم على طلعه على كيفهم


أكافئهم عقب تعب الدراسه والأمتحانات.......فوقع أختيارهم على مجمع 360
{ كافيه كاكاو } صوب الحدائق المعلقه....


كلنا طلبنا كافيه لاتيه ما حبينا نغامر وكانت سيئة الطعم وبسرعه بردت .

وفوندو لشخص واحد بس وسعره 4,500 احس سعره خيالي ولج اختيارين بس للتغميس ونوع واحد شوكلت عندي شوكلت بار احلى واوفر.

وبراوني كيك وكانت لذيذه وكان سعرها 2,900

وكلاسيك كيك وهم كانت لذيذه وكان سعرها 2,200

وطبعا cheese cake for me وأختي بعد خذت وحده كان سعرها 3,000

وأختي طلبت براوني شيك وكان سعره2,150

عجبتني طريقة تزين الصحن أحس لذيذه وصج أسم على مسمى : )

حسابنا كله طلع 25,700 يستاهلون خواتي الحلوين:)

تقيمي للكافيه مكانه شرح وعندهم قعده بره بس ماأغامر أجربها بالهوقت والظهر مستحيل ان شاء الله اذا الله عاطانا عمر بالشتاء الياي اجرب القعده برا لأن الكافيه عجبني عندهم الكيك والشوكلت صرااااحه لذيذ والطعم واااووخفيف على الجبد :)